Sang Naupangte leh Nu-le-pate kung a Laihah

By Rev. Hangpi Manlun

Awle, khawvel nite hing kihei lamdang jel in adieh in Sangnaupangte ading in I Laisimte uh result suoh hun ang hita sausau alungdam huai isa mama uhi. Adieh in eimite jong Pasian pui na toh Laisiem leh pil pipi itamta ua, nidang lai in 1970s or 1980s lai a Pawl sawm result angsuoh chiengn in eimite itom thei mama ua, a pass sunsunte jong third devision ahi deu pen , a Second division tan tungte pen asang mama uhi. Ahin, tulai in Class X apat MA tan in jong result ang suoh chieng in First division atamta mama a, tulai topper ahisih leh rank ilajouloute pen minadan asuohta mawh hi.Tamte khu Pasian thupha ichilou theisih uhi.

Awle tuin Sangnaupangte leh nu-le-pate maban ding i gen lang ding uhi.

1. Tupkichien nei ding ahi. Laisim sang naupang khat in amaban ding atheichet ngai masa hi. Milawchingte hinkhuo i et leh min a carrier ding uh khu Class X ahimasang un aut uh leh tup-le-ngimte anei khinta uhi. Tuami toh kituohin lai asim pai vinveng uhi. Tup kichin neikhu lawchinna bulpi ahi. Thupil in “abulpat dih khu akimkhat jawsa” achibang in mi tupna neite hing lawching teitei uhi. Tuajieh in Sangnaupang laisim in amasa pen in tup-le- hi-ut khat aneimasah angai hi alawchin na ding in. Tuabang tup-le-ngim neiloute pen alawching ngaisih ding uhi. Pawl IX ka sim lai un ka sangshipa un ka tup uh ang dong a, kalwmpa khat un kei sajuak ut ing ang chitalai jang a, ka shiapa uh jong lungthah in ajep law hi. Tambang sang naupang itam jieh un kilaw ching jou lou ahi hi.

2. Eima hina kithei chien ding ahi. Tulai in lai isiem uh toh kituoh in mizousie in Science bang ila ua, ahoi mama hi. Ahin, nangma khu lai siemthei na hikhol sih leh minlata chi science chite moh la ding jong hi moh lou hi. Khenkhatte in lah kou khu a tami subject la umlou chipou in subject a moh telkia ua, tuakhu lawsapna bulpi khat ahi hi. Amasa in eima siemna leh hina kitheichien masah a i subject ding tel siem mama apoimaw hi. Kei jong Class X ka sim lai in minlata chiin ‘Higher Mathematic” kava lah phuot a , a Mathematic nadanpen jong ( ngiempen) joulaw pa khu ka buailaw giep hi. Kalomte lah jiehpi in kavala moh a tuabang khu khanmaw boh vot ahi. I gensa bang in mikhen khatte in lata chijieh e, amin hoisah jieh a Subject mohla khu miphahlouna kipatna bulpi ahi hi. Asiemloupi khat in Science subject valah a fail emaw third division pou a jaw sang in Arts hoitah kilah first devison in jou lei imaban ahoi jaw ding hi. Tuajieh in subject lahding telsiem mama akul in apoimaw masa hi. Ahin duthusam ah Class XII tan vang Science lah a aban pen eima tempaina khat jui khu ahoi hi. Ajieh ahileh Competative Exam na ding tamtan khu a basic ahijieh in. Math leh science siemlouta luota jong Cenral service khat ang gel chieng un ang lawching jou leng sih uhi.

3. Nu-le-paten jong tate guide siem poimaw mama hi. Tuania Laisiem tamtah lawsapna khu nu-le-pate apat kohmuna/ guide na atahsapna jieh uhi ahi. I tate Sekul or college akaipou leh kilung kim mawh in tuakhu ilawsapna uh chi khat ahi. Tuajieh itate tempeina khu theisiempi apui huai apoimaw hi. Mihing in ilunglutlou khat jil khu lawsap kipatna ahi hi. Etsahna ding mi khenkhatte in Science alunglut ua, seat amulou jieh pou in Arts ahiai commerce subject latamoh leh aduthusam bang in ajil sih ding china ahipai hi. Tuajieh idei leh siemna subject ma lahpai ajilpai chalchal ding ahi. Tuading a nu-le-paten tate siemna theipi a kohmu ding ahi hi.

4. Kichomdan jong pilvan angai hi. Eima neisa bangma umloupi a mitten jong atate uh kaisahta chi Shillong e, mundang Delhi lah apong sawlpai ding ahisih hi. Adieh in Class-XII tankhu Manipur ahoi mama hi chi khu manghilou ding ahi. Amavang graduate leh a tunglam pen ahithei liai leh State pulang asimsah ahoi mama hi.Tualeh Laisiem ngellou pongchom khah khu innkal kitoitheina ahi a, imi chompen theichet apanlah ding ahi. Deisah kinei a I inn ilou juoh jen ikichon vang un ahilou dingte khu ichomna nasan lejou a damsung au i chom den ding pawl bang ang um law uhi. Thamlouin, khamthei bawlpi khat chawmkhata moh lei ang nemang ding hi.

Tualeh laisimten jong manghillou ding ahileh nu-le-paten aneivalua ang chom uh hilou chi thei a, laisim ding ihileh lai mama sim chalchal ding ahi. College kaina hi a sildang foot ball e, Music e sildang pou a na lunglut leh alawsamsa na hi chi na kiphoh ding hi. Mikhen khatte’n atate uh umdan ang ahil ua, katapa College kai ve a kava kuon leh a sangshiate un natapa foot ball peh siem mama ang chi ua kada mama a chi hi. Khatpa ahileh atapa khu Music alunglut a minthanna leh nehmuna lah ching joulou in apei suollaw uhi. Ajieh ahileh alunglut louna ding uh alunglut gel jieh in amanthailaw giep uhi. Tualeh neilou sasa leh leiba ba jena mun dang kisawl jong ahoipen sih a, ahin imichompen ahoi akukal leh lah akhawh sih ding hi. Mikhangtou leh ta laisiem neiten naupang chom khu Bank a sum koi toh kibang achiua tuabang chingam ding khop itate ahi uh leh theitop a chawm angai ding hi.Taginalou chawmkhatte ahileh nidanglai in “Nu-le-paten bawi aw hingkhang mengmeng aw nutha dawn aw pathadawn aw, chin la asa ua, tulai in ahileh bawi aw hing khang mengmeng aw nutha patha leh neisateng topkang aw” chila sah thei jing ahi hi.

5. Nu-le-pate bawlkhiel pawlkhat. I gensa bang un itate uh khu neilou sasa in BA bang gamdang ah izilsah ua, eipawl in i taten BA ang jaw chieng ua, kham mupai ding leh alawching dan in ikingai ua, tuakhu itate lawsapna bulpi khat ahi. Keima ngaidan in natapa/tanu khu gamdang a BA na jawsah a aban na chomjou lou ding thouthou leh Innlam ah BA jilsah inla ajaw chieng in coaching la ding in Delhi e khat sawl lechin alaw ching bai jaw ding hi. Eiten BA tan ichomjou chieng a lawching pai ding dan in ingai ua, thamlouin gim leh toljong ikisapai ua, abul panpan ihi lam itheisih uhi uhi. Tami theikhiel jieh in itate uh gamdang a BA jou central service gel theilou a inn lam a Private sang shia semdia ang pei uh a ngaita moh hi. Tualeh ita khu BA tan ichom jou leh kham ageldoh theina ding a kumni/kumthum coaching ilahsah jou sih leh a lawching jou sih ding uhi.

6. Sum-le-pai adeidandan ua piehna/ duotkhielna. Tulai in nidang toh te in ikhangtouta ua, mun dang gam dang ah itate uh laisim in ikoi jou ta uhi. Ahin nu-le-pate bawlkhiel mama khat kia ahileh neilou sasa in sum-le-pai khu akhut uah ilutsah pai uhi. Etsahna ding in inn aum lai un sum-le-pai kichimongmong akhut uah ipengam sih ua, mun dang a ang um chieng un aloutheilou ahidung jui in akhut uah sum asing sing in ilutsah ua, tuakhu naupang ading in sietna kipatna bulpi khat ahi hi. Ahithei liai leh guardian bang neisah asum-le-paite jong ama uh tungtona hah bang ahoi mama ding hi. Tualeh mundang khu ei gamtoh akibang sih a, siljousie utut a mutheina na ahi, etsahna ding in innlam a damdoi leh zuu imuloute uh khu khopi sung ah deidandan aleithei leh muthei ahijieh in akhutua sum alut chieng un ajang akhiel lou thei sih uhi.

Thamlouin, deisah kisa in Mobile hoipiipi, Laptop leh Bike chite bang ileisah ua, amauten lah a Mobile leh a Laptopte bang uh laisim lou jen a sun ajan laa ngaina leh milim hoiloupipi etna in akijah ua, tuakhu amanthaina uh khat ahi hi. Tualeh i bike leisahte uah, amaute in College kaina a janglou in nungah helna leh Party peina bang in akijah jasop ua, tuakhu guoljawlna itante uh imanthaipina uh chi khat ahi hi. Tuajieh in Mobile hoipipi leh gari chite bang jong aloutheilou ahisih leh pong leisah lou khu tate khantouna ding ahi jaw hi. I deisahna lam uah imanthat law jel jel uhi. Nidanglai in Delhi a laisim khat bang apa in bike chite leisah sih henla, lai hoitah in sim leh IAS jouva kichi khat ka ja kha a da um mama hi. Eiloi toh kibanglou khat igam a MLA khat in atate Bangalore ah College akaisah a bike chite leisah lou in Scooter hoilou khat me leh akulleh poimawte leina ding aleisah akichi a etton tah kasa mama a apa leh atate, nikhat ni chieng in adeidei uah hing taijou thou ding uhi.

7. Theitop apan lah tah zet angai hi. Tulai pen ipi leh pute hun laibang ua, samat , galmat , lou haw sing puoh kidemlai hitalou in lungtang leh laikung (penmuh) a nehsuilai hita hi. Ipu ipaten sa huja kamat, ganta hujat ka khoi, chileh bu-le-bal akhamte khu mithupi leh mitungtuang ahi uhi. Tuate khu eite ading in umzie umta lou china ahita hi. Tualai peh AK 47 tangsang leh namsau, teipite sang in jong pen muh in na asemthei jawta hi. Tuajieh in laisimtheite in simtahtah sim ding ahi. Kimolna dan leh time past na dan laina sim leh mina pha ngaingai sih ding hi. Tualeh adaum mama kia khat ahileh Pa tamtahten atate uh ama uh sang a Laisiemjaw a siemjouta lou in ta tamtahten apate uh siemna pilna phajouta lou a i um moh uh khu ada um mama hi. Khang kisam ding ihi uh china ahipai hi. Na pa sang a laisiemna ana san johlou a, natate nang sang angiem joh leh vang adaum lam china ahita hi. Nu-le-pan a chomjou ding tate tata lah alawsam pen kihitamoh in adaum mama china ahi.

Tuajieh, in lawchinna ding in nule-pate leh asimten theitop suatahzet ahunta hi. I gensabang un tulaipen first devison chite jong phatuom nonlou in atopa pangloute adingin lampi a um non sih hi. Tuajieh in theitop a simtah jet ahunta hi. Akukalte khu hing lawching teitei uhi. Etsahna ding amin uh hing louta moh leng i SDO nu uh leh Dr. David Lalpite khu kei mi theite lah a laism tai mate ahi ua, tuin alawching tuohta gel uhi. Amau gel laisim pei bang in eite jong sim pei lei ama uh tunna tung jou sih lei jong mi kipha chiet ding hi. Thupilin “Ama leh ama kipanpite Pasian in jong Panpi” achi khu adih hi. Kei mimal ngaidan in a bright kisa a laisim peiloute sangin apongpan ten Bible gen bang in apong lah jaw un alawching jaw uhi. Tualeh gentah sih leh jong Laisimna lam ah ken jong gen ding kaneive a, 1996-1998 sung in Eastern Theological College, Jorhat ah B.D kasim a, kijawng mama in neh-le-tah hoilou ban ah a climate asat seng ban ah Lai kasimluot jieh in ka tuop ah TB kaveilaw jen hi. Tualeh 2001-2003 sung ma in United Theological College, Bangalore ah M.Th kasim kia a kumni sung a jankhuovah a kalaisim na kigom leh hathum bangphava ka chi hi. Tuin Ph.D or D.Th kasimkia asun ajan aka sim leh jong naisai tuohsih na lai hi. Nang gen ding bang na nei eile? Laisimna lam ah. Pasian jal in kisiana ding neilou a lai kanasim pen ka lungdamna mama khat hi. Kou Pasian thu simte bawn in tambang a kasim uh leh noute alesawm a na sim uh angaina lai ding hi.

8. Pankahwm hunta hi. I innsung alaisiem khat aum leh abe aphung e ahisih a Nam ajong pankhawm a chawm ahunta ahi. Namkhangtoute apangkhawm in kisom dal siemua tuachiin ang lawching uhi. Adieh in ei Zoukampaute khu IAS, IPS Leh IRS chite aneinailou Nam ihina lai vevaw ua hasiet um mama hi. Mi apata, auta ua aum laiua ei inam buppi a jong aumnailou chipen Laisimte ading in theitopsua hun hi. Nangkhu Zoute lah ading a IAS, IPS, IRS masa pen na himaithei ding hi theitop apan lah hun ahita hi. Ahin ada um mama khat ahileh tulai ilaisim khenkhatte Delhi lah aduthusam uh ahileh Singngat Constituency a MLA dinding chipou ihoulim thanopna uh hileh kilom a da um mama hi. Kumnga sung lal ding sang adamsung lal ding tupjawh ding ahita hi.

9. Felluot/taimatluotlou ding ahi. Laisim na hisung a na fel luot leh dacheing in a fellou pen na hi ding hi. Ahitheitan a laisim sung a activity tamtaluo ajong pan lou ahoi hi. Laisim hun khu leadership siem hun ahilai jang sih hi. Laisiemphot leteh leadersa na hileh tah hi. Ahitheitan ashini mani leh khotang ajong laisiem hun sung akikang koi ahoi hi. Thamlouin Pasian thu ajong kijah dingma ahilai in na laisim ding don lou jen a kijahlou ahoi hi. Etsahna din exam kuon a lajil, khawmpi va haw leh jankhuovah avathum, camp leh crusade chite kijah tamseng jong ahoi tuon sih hi. Biehinn kai hun kai a, Biblete sim jel aum ding ahi jaw hi .Ahin Pasian manghil jen a sim ding china hituom sam sih hi.

10. Laina siem leh siljousie nang ahita hi. Tam leitung damsung ading nana in Laisiem khu ahoipen ahita hi. Laisiemlou a hinghaute jong sawt daithei tuonsih ua, innten louten dan jong akitup thei tuon sih uhi. Ahin mikhat lai ang siem leh asiemna khu koima lahpiehthei hilou ahijieh in gou manphatah asuoh hi. Thamlouin mi lai ang siem a khamhoitah khat ang nei leh utlou sasa ahau ding, car, building, power leh mite jatatna chite ama hisa ahi hi. Tamte thei in mi ta laisiem neite apate un, tuin jawng lei jong dachieng in itate ang lawchin chieng un tam building leh carte ei ading ahiding a chi phiu phiau ngam uhi. Eiten ichingam diai le? Mangpan asimtu jousie eiguoljawlta hen.

ZPC Bangalore honna toh kisai a lungdam tutna

- Rev. Hangpi Manlun, Incharge Pastor ZPC-Bangalore

Amasapen in Pasian mapuina toh Zou Presbyterian Church-Bangalore honjaw ahina toh kisai in tam anuai amite kung ah kipahthu ka gen ut hi.Amaute tahsa gam ihilai jieh in muthei hattuom ah pawltuomtuom dan khat ahiphot ua, ahin mutheilou hattuom ah Khrista Jal in akibang ihi ua, thamlou in sapten “like minded” achite uh kei ading in ahi uhi.

1. Zolengthe Editorpu in ka minsiet khah ding bang ang na dipkuotpi mama in jong ang jaupi mama a, Pasian jal a tutan bangma thusie lawmlawm a umlou tah in ama jong adipkuat na pha jou hiel hiel hi. Zolengthe Sms ban ah website ah hoitah in ang suosah a khovel pumpi a Zoutaten na muthei pai uhi. Tambang chi leh nam ngaina leh mi fel i neikhah pen Zou vontoite ading in kiletsahpi tham ching hi. Pasian in vangbuohta hen.

2. Rev.Henkhothang Tungnung, D.Min Student USA khu bang chihlai pou a Pasian thu a ka kikuppi thei leh hing guide tu in jong na bawl kinkin in khopi ah hattuom nei hun hita chiin ei tohtoh a ama tung ah jong pawlpi sih-le-tang in lungdamthu ka gen hi.

3. Rev Lalpu, MELC Delhi Pastor in in jong telephone tungton in ang lungdampi thu ang gen a, amatung ah jong kipahthu ka gen a, tulai Pastorte leh nidanglai Pastorte vang kikhiata vot e maw, nidang lai in pawlpi khat in Hattuom ahonding leh adangte jong kitahla in kitunkhum vapuol bang ihiua, tuin pen kipatattuotheita ihi ua khangtou mama ihita uhi.

4. Rev Hau Samte, tulaitah a Korea Methodist member sanggiet vel lah a Pastor na va sem ka loi hoitah in jong lungdampina thu eithot a lungdam mama ing, ama tung ah jong lungdamthu pawlpite sih-le-tang in kigen hi.

5. Rev.Thainkhanlal EOC, Pastor Bangalore khu ka doh masahpen pawl ahi a,aman phut kinkin un chi in angtoh a,tha angpia mama a, jong ahon ni in amemberte toh ang uop hoi mama uhi.Ama tung ah jong kipahthu kagen hi.

6. Rev.Tunson Tunglut, EBC Pastor Bangalore khu imi isate Bangalore a na huaituptu leh na siempi chingtu kichi leh kichi khiellou ding hi.Aman jong hattuom ding ding ang deisahban ah imi isa Pasian dan akitengloute bang na ngaikhoh in nivei thumvei kitengsah ding in ang gen a ama leh amemberte bang in hoitah in ang uap ua amaute tung ah jong lungdamthu ka gen hi.

7. Rev. Father Mark Thangkhanai in jong aumna Australia pan in Zolengthe tungton in ana sim in lungdampithu angthot vevaw a, ama tung ah jong kiphathu ka gen hi.

8. Thamlou in Bangalore a, Zomite kipawlkhawmna Zomi Christian Fellowship Bangalore lamkaite bang in jong ang lungdampi mama ua, silpieh sum tanpha toh ang phung vuh ua maute tung ah jong kipahthu ka gen sonson hi.

Alalelam dai ah ZPC mi lehsa, thamlou a pawlpi min a hamphatna mua mudang gam dang aum law jojen khenkhatte bang adem in apangthei ua chijat huai leh lamdang chilou ngal gen ding dan ka thei sih a, “Pawlpi ngaina theilouten Pasian jong angaina tahtah sih ding ua, Pawlpi nu-le-pa a jangtheiloute in jong Pasian jong Pa tahtah in ajangthei sih ding uh” chi khu ka gentheitop ahi hi.Tampen koipatat i utna leh deina ahilaijang sih a thu umdan gen na ahijaw hi. Koi in hingpatat sih leh jong Pasian na pen apeitou jeljel ding hi .Eite shi jouchieng a jong Manggam na pen apeitou jing ding ahi chi manghil sihva uai. Genkhel genval aum leh kingaisiemvai e.

BANGALORE A ZOU PRESBYTERIAN CHURCH HING PIEN KHIEHDAN LEH HONNA REPORT TOMKIM

Bangalore leh India khopi mun tuomtumte a hattuom ding ding khu hunsawttah akipat in Synod lamkaite lunggul, thumna leh houlimna ahi jing hi.Tuaban ah, Bangalore a imi isate’n jong munkhat a Pasian biehkhom ding leh kipawlkhawm ding na lung gul uh in, apeisa dated 12, February 2006 in Zou Christian Fellowship-Bangalore chin ana ding ua, kumkhat dettah phiel nuom tah in ana kipawl khawmthei ua, ahin bul-le-bal det leh lamkai ding Pastor chi bang ana neithei lou jiehun ana dingdet jou lou asuoh uhi. Ahin hun leh nite hing peitou jel jel in bangchih chieng in iminam min leh iham iapute in Bangalore ah Pasian ibethei diai chi in thumna tamtah nei in lungulna ana nei chiet ua, mi tam tah apat ngaidan kija dung jui in kipawlkhawmna ding na phu mai bang ana lunggul ua, ahin tambang na pen eima chomngaina leh tahsa vai ahilou jieh in an kipan doh thei sih chi ding ahi hi.

Tuachiin kei jong Pasian leh hattuomte deisahnate tang in United Theological College, Bangalore ah Doctor of Theology zilna ding toh kisai a entrance test nei ding in tukum February in kava tung suh hi.Tuachiin, Zomi Christian Fellowship leh Mizo Christian Fellowship ah kava kikhom jeljel a, tuanah eimite khu za val bang umlei jong nasem silbawl ngentang akihijieh in, amaute ading in Sunday chite khu leave(suty) munahsang in a buai ni uh ahi chiet a, biehin kaithei khu mi nga jong phalou phiel in a ki um hi. Aumdan ahileh Bangalore ah kum 10 bang um le uh jong Pasian ni a kikhopna ding hun mulou ding ngentang ahi ua,tamna pat in Pasian in keima lungtang ah veina leh puohnatna lien tah ang guon in ka thei a, “Chingtu ding neilou belamte” bang in ngaituana ang neisahta hi.Tualeh gingtha va siemjou sih lei jong imi isa Khristian hisate beh suidoh a mansuao lou ding poimawna lientah ahing umtou jeljel hi.

Tuachiin lawm-le-guolte leh Synod nu-le-pate toh kithujah leh ngaidan kikumtou in thumnate toh kibaw juitouin, Dated 26, July 2009 niin Ka umna UTC, Quarter ah Meeting kibawl in tam anuaite thumang tah in ang peikhawmthei uhi .Amaute

1.Pa Soson 2. Pa Hauneithang 3.Tv.Thangkhanlal 4. Pa Soiminthang 5.Tv.Langminthang 6. Tv.P. Thongkholian 7.Tv.Khakhai 8.Ms.Muanching Manlun 9. Elle 10. Bliss 11.Tv.Kamhauthang 12. Tv. P.Hangmuanlal 13.Tv.Manglian 14. Tv.Muanthang 15. Tv.Max.Ginlianthang 16. Lunmung 17. Khupsuanhau 18. Nu Maman 19.Nu Rebekka leh adangdangte ahi uhi.

Tam meeting ah Rev.Hangpi Manlun in Convenor hina la in, Pa.Hauneithang Secretary apang in meeting pat ahi. Hunpatna ding in nungah Muanching Manlun, in thumna nei in committee pat ahi .

Tualeh Rev.HangpiManlun in memberte a chielna banga thumang tah ang peikhawmna tung uah kipahthu genna leh vaidona nei in, pawlpi um poimaw sah dan leh imi isate aveidan tomkim in mipi peikhawmte masang ah a gen a, tuazou in mipi peikhawmte ngaidan lahna jong nei ahi hi.Ngaidan gen jousie akipat in Hattuom phu hoisahthu jah ahi a, ahin bangma thutop (finaldecision) lahthei ahilou jieh in committee kia chieng gen a fesah l ding in koi ahi hi. Tualeh eimite pen mi kiphal leh bang ahiai khat ibawlchieng ua, bang ahiai nehkhomna khat a um lou leh thupi ching a ngailoute ihijieh un Pa. Soiminthang in Meding (Sa) tuoh in Nu Rebekka in anntang tuoh in committee peikawmten annkuong sawhkhawmna jong amaute kiphalna toh kinei hi.

KIMUTUONA NIVEINA

Committee niveina dated 28 July, 2009 10: pm Kei Quarter, U.TC ah neikia ahi hi.Tam committee a member peikhawmte.

1.Rev.Hangpi Manlun 2.Pa Hauneithang 3. Pa Soiminthang 4. Tv. Max. Ginlianthang 5. Pa Muan Zou 6.Pa Henry 7. Tv. Ginmuanlal 8. Tv.Langminthnag 9. Tv. Lialian 10. Mimin Zou 11. Khuolianmang 12.Tv.Thangpi 13. Nu Maman tea hi uhi.

Tam committee ah hattuom phu leh phu lou ding thu nguntah in hunsawttah genkhawm ahi nua in, phu ding in lemsah ahita a, tuachiin dated 28 July, 2009, 10:45pm in Zou Presbyterian Church- Bangalore phu ahita hi. Phu ahitoh kituoh in tam anuai ate khu lamkai ding in tel leh guot ahita uhi.

Amaute :

Chairman: Pa Soiminthang
Vice Chairman Pa Muan Zou
Secretary Pa Hauneithang
Asst Secretary Tv.Max. Ginlianthang
Finance Secretary Tv.P. Hangmuanlal
Treasurer Nu Rebekka

Adviser dingte: Elder M.Letkhanthang leh Rev.Hangpi Manlunte ahi uhi.

ZPC-Bangalore phu ahitah jieh in Synod lamkaite jong theisah pai ahiban ah confirm angbawl ding ua nget ahi dung jui un amute jong hing kihong in akin kin in angngaitua ua, bangkim ang lemsahpi thei uhi.

Tualeh tam Meeting ah Tv.P.Thongkholian in Saa (Meding) tuoh in Nu Maman in anntang a tuoh in committee peikhawmten annkuong imkhawmna jong kinei in memberte’n atung uah lungdamthu kigen hi.

Meeting thumveina

Dated 19 August, 2009, 7: pm in UTC Quarter ah kimutuona thumveina nei ahi kia hi. Tamna member peikhawmte:

1. Elder M.Letkhanthang 2. Rev.HangpiManlun 3. Pa Soiminthang
4. Pa Hauneithang 5. Tv.Max.Ginlianthang 6. Pa Muan Zou
7.Pa Soson 8.Tv.Langminthnag 9.Nu Mamante ahi uhi.

Tualeh tam committee ah ZPC- Bangalore honna mun ding leh Synod lamkaite vaidawn ding dante akingaitua pen deu hi.Avaisaite apat report mu ahidung juiin Dated 14, September, 3:00-6:00 pm sung a, City Harvest, AG Church, Hennur Deppot Biehinn honna anei ding in phasah ahi hi.Tamte khu memberte pankhawmna leh adieh in adviserpu Upa Letkhanthang in feltah leh hoitah a hing saipieh jieh in ama tung ah committeete kilungdamna mama hi.

Committee in angansie dung jui in dated 11, jan dah 11:00 Pm ah Bangalore Airport ah Moderator leh Secretary vaidawnna Uap M.Letkhanthang leh Rev.Hangpi leh Muana ten avanei uhi. Tauchin ajing ni Pa. Thangpu lamkai in inn vena akineipai ngal a jing kal dah 7:00 AM kuonpen nitah dah 8:00 Pm bang in akitung kia pan giap hi.Thamlou in a umsung teng uh leh ahonni tanpha in inn vena leh mite thumsahna kineitou pen lamkaite jong kisitlou kei in ami asate uh angaikhohna jieh un gim leh tawl khawhsa lou in apangveva ua, tuakhu silthupi leh chiemte tah khat ahi hi.Tualeh Pasian nitah dahthum in Zomi Christian Fellowship ah Moderator pu in Pasianthu gen nei in tuanah member auapthei ten va ki-uop hi.

Tualeh Pasian ni nitah 6:30 Pm in UTC, Quarter ah ZPC-Bangalore lamkaite leh Moderator leh Secretary toh Joint Meeting a kinei hi. Mailam a kalsuontou na ding a kul-le-poimawte genkhawnna akinei a kisel leh buaina umlou in ngaidan kibang tah leh kideisahtua in kijouthei ahi. Tam Committee ah Tv.Muamuan Manlun in Me ding (sa) tuoh in Nu Rebekka in anntang tuoh in committee ten ang kuong kisawhkhawm hi.

ZOU PRESBYTERIAN CHURCH- BANGALORE INAUGURATION (HONNA) PROGRAM KIJAHNA REPORT.

Ani : 14, September, 2009 Ahun : 3:00-6:00 Pm
Amun : City Harvest AG Church, Hennur Deppot.

Detailed Programe

Conductor : Chairman / Secretary ZPC-Bangalore
Opening Prayer: Mrs.Maman
Special no. : Ms. Muanching Manlun
Wellcome speech: Elder M. Letkhanthang Adviser ZPC-Bangalore
Zou Presbyterian Church Honna leh Committee memberte adia thumsahna: Rev.Awnkhankhup Moderator, ZPCS
Thawlawm lantu: Rev.Tunson Tunglut EBC.
Special no: Elizabeth Munluo.
Short speech: Rev.HangpiManlun
Special no. Indira Nagar Male Voice
Message : Upa M. Kamzadou Secretary (Sr) ZPCS
Sacrament Service by Moderator ZPCS
Vote of thanks: Pa. Muan Zou, Vice Chairman ZPC-Bangalore
Benediction: Rev. Thainkhanlal EOC

Tualeh ZPCS lamkai vaihawmte in kiphaltah in tam inauguration nia jahding in dangka Rs.10000/- (Singkhat) ang pia ua, tuate toh neitah khenkhat kilei in iprogramme uh lawching tah in kijangthei hi. Tualeh Committee masa a ZCF, EBC, EOC leh GILEAD Minstryte chielding a thupuosah ahibang in akichiel a, ama uh in jong tomngaitah in ang uop uhi.Thamlouin, Tv. Chinkhanlun in ZCF sil-le-tang ih thugenna leh hanthwanna hing nei thei in kipahpina silpieh ZCF min in Rs.500/- in ZPC-Bangalore phungvuhna nei hi.Tuaban ah Rev. Tunson Tunglut EBC, in jong pawlpite sih-le-tang in hanthawnna hing nei in, amaban ah Rev.Thiankhanlal EOC in jong deisahna leh kipahpina thu hing gen pieh hi. Tualeh ZBA Pastor Zamliankhup M.Th in jong lungdampina thugenna hing nei hi.

Tualeh Mr. Khamchin Tunglut, EBC Music Director apatin phatna la ngaikhieh ahia, BBBC&S student Biehpi leh alawmpa leh Tv. Langminthangte apat in Phatna la ngaitahtahte ngaikhieh ahi.Tualeh Unau EBC, EOC, ZCF member tamtah in jong ang uap ua kilungdam in kilimtuom mama hi. Tualeh Pasian lungsietna toh hattuom hon ahini in silpieh sawm-a-khat Rs.10790/- (sangsawm leh za sagi leh sawmkuo) angluthei ngal hi.Tuaban ah tuohkhawm Rs.1128/- (San leh za leh sawmni leh giet) dawnkhieh ahi hi.

Chiemte tah pawlkhatte:

1. Pasian puina kinem in kalchin Thawleni (Tuesday) dah 4:00-6:00 pm ah City Harvest AG Church, Hennur Deppot a ZPC min a kikhopna nei jing ding chi ahita hi.

2. Tualeh mundang a hattuom a kiphu chieng in buaina leh thusia la sia atamthei mama a, tutung in Mangpa puina toh thusia lasia jah ding umlou in akihongthei a lungdam huai in Pasian puina chiloutheilou ahi.Thamlou in, innlam apawl tuomtuom a um hinalei jong tam hattuom kihongtha khu Zoukam paute jousie huopin in akipangthei a, keima mudan in innlam ZPCS a member na hiloute khu aumding deileh ahapan pen in apang ua, tamna pat in laphuohtu in, “Van Mang naubang akana ah alamdang tuom sih uh” achi khu atahtah in akimuthei hi.Pasian in thupina tangta hen.

3. Tualeh tam hattuom kihongtha khu a enkawltu khu Zou synod hijong leh koima kideidan leh nangkou kichilou in Bangalore i umsung teng ua, munkhat a iham ipau a Pasian ibiehtheina leh tahsa hagau a Zoutate ikihuaina ding uh khu a tup leh angim ahijieh in kihong tah a peitou jel a, thamlou in ZOMI CHRISTIAN FELLOWSHIP nuaia jong Unit (Active member) hichiet ding khu lamkaite deidan ahiban ah, ZCF policy leh programme chite toh jong kikalsahlou ding khu lamkaite tup-le-ngim ahi toupeh hi.

4. Tu-le-tu in ZPC-Bangalore in zong Zou Synod nu-le-pate deisahna toh van neitah tambang in aneite chiemte ahi hi.1 Acoustic Guite khat, 2.Offering bags ni, 3.Sacrament trays ni leh anou 100, 4.Register bu khat, 5. Cash books ni, 6.File covers nga 7.Labupi sawm 8.Receipts bu sawm 9.Khanglai labu ni, 10. Constitution bu chite ahi hi.

Tuaban ah Laphuohtuten “Kingai man a kihoutangthei lah hisih hai a” achi bang un, kikhen hun hingtung in dated 15, jingmong in kikhenna leh kivaihana Annkuong Moderator, Secretary, Rev.Thainkhanlal, Upa Letkhanthangte toh UTC Quarter ah nein lamkaite Upa leh Pastorpa lamkaina toh Rail Satation ah vaha khia in amaute jong Delhi lam juon in ang peisanta vangvang uhi.Atopna ding in tambanga programmete lawching tah ajaw ahitheina jieh khu ibieh Pasian jal, leh Synod vaihawmte leh amun a mite kihonna jieh leh ahttuomte thumpinate jieh ichilouthei sih hi. Genkhiel gen val leh kilawmlou tamtah genkhah aum leh asimtu jousieten nang ngaisiem uh kahing ngen hi. Ahoi apha umte Pasian in thupina tangta hen. Amen.

- Report by
Rev.Hangpi Manlun
D.Th Student, UTC, Bangalore

Bangalore Zomi Christian Fellowship tuom sese, adang toh ki bang lou

- Rev.Hangpi Manlun, D.Th Student, UTC, Bangalore

Bangalore Zomi Christian Fellowship leh mundang ate kibahlouna kamudan tomkhat ka hing kum nuom hi. Pasian leh hattuomte deisahna toh 2001-2003 sung Bangalore ah Master of Theology (M.Th) zil in United Theological College, Bangalore ah ka va um a, tualai in Bangalore ah Zomi Christian Fellowship ah ei Zomi a kikhaikhawmzousie kitel kim hi. Innlam a hattuom kichi mongmong kimukhalou in, nuom mama chi ding ahi. Thamlouin, Pastor zong kineijou in unau kawllam (Mynmer) te bang a tam mama uhi.

Ahin tukum January in Doctor of Theology entrance test bawl a kava pei kia leh na kikhel mama in, asie chia kagen na hilaijang lou in, hundang toh na kibang lou a tuate neukhat ka higntah lang nuom hi.

I khantouna uh khat hi dingin zong ka ngaitua a, innlam a hattuon Evangelical Baptist Convention (EBC), Evangelical Organization Church (EOC), GILEAD leh Green Hill Minisitry chite na umta jengjung moh uhi. Tuate jousie lah amemberte khu Zomi Christian Fellowship nuai a active member hi veve in, amau lemtanna hun khat a kikhopna aneichiet ua, Pasian ni nitah 3-5 Pm in Ebenezer Church, Bangalore Centre, MG Road ah Zomi Christian Fellowship min in ka kikhop chiet nainai uhi.Thamlouin, tamna pawlpi dan in kidding leh jong ZCF ah member kihichiet in nopni dani a ki-enkawl khawmding in ki umkhawmthei hi.

Aumdan ahileh dual membership kineichiet china ahipen mai a,tamte i etleh Zomi sung a Zou kam paute (Zou) te lou ngal i Zomipite hattuom leh Organisation a ding chiet uh china hipen mai hi. Tualeh imite lah (Zoute) 99% (percent) khu na sem akilaw, Pasian ni leh kiginni a leave mutheilou ngen tang ahi ua, Bangalore ah kum sawm um le uh jong Pasian ni a kikhopna ding hun lemtang mutheiloute china ahipai uhi. Pasian biehna ding hun neitheilou, sacrament ne lou ding leh Pasian thu ja lou ding te ahita uhi.Tuate khu awlmaw huai leh puohnat huai mama khat ahipai uhi Thamlou in biehinn kaitheilou aumpen lemtang sa a utut aum nuom jong aum ngal ua, tamte ading in Pasian a Biehna hun ding khat uh a suty uh toh kituah a bawlsah a Pasianthu hilkhu hattuom dinsan leh mawpuohna ahita hi.Tuachiin ZPC in jong atamjawte suty mutheini ding Kalchin Thawleni (Tuesday) ah City Harvest AG Church ah 4-6pm sung a kikhopna nei ding in thupuosahna akineita hi.

Tualeh mundang toh akibahlouna kia ahileh ki-etdangna umlou kei in Zomi Christian Fellowship ah kipang khom nainai in, Programme bang kim jong ZCF toh ikisuhbuaisah lsihpou leh alemtang khat suoh china ahi pai mai hi.

Tualeh ZOMI CHRISTIAN FELLOWSHIP in lah pastor tulehtua neita di lou ahiban ah fellowship ahi mohchieng in kiteng nuom, baptistma tang nuom leh damlou hamsat khat imiten tuoh leh jong buai huai ding abahtah jieh in leh mi ama member leh berlou umthei ding ahitah jieh in eite jong kikaikhop hing ngaita chi ding ahimai a, ZCF in jong tambang akikai huaina pen jada senglou in kikai huailouthei lou asuohta hi.

Tamte jieh in Zou Synod in jong imi isate i kaitup ngai ding hi chi lung gelna anei chi ding ahipen mai hi. Ahin milah ah akikhentham akihilou jieh in Bangalore i umsung un i ham ipau in Pasian phat in alasa khom lei chi lung gelna ahijieh in koipou lungluttah Bangalore i umsung ua hing pang chiet ding in ngaina tah in ikichiel sonson hi.

Thamlouin, tambang a kikaikhomna mun danga um chieng in buaina leh kikhennate apiengthei leng a Bangalore umte ahileh kilungpi chiet in tunin dong in gen leh sah nei ki-umlou in aki-umthei a Pasian puina chiloutheilou ahi hi. Pasian in thupina tangta hen.

Tuajieh in koipou uleh naute aumdan na theisiem ding in jong ka hing ngen ngal hi.Tualeh kou asung aumte sang in nou apawlam aumte na buai jaw uh abang a, tunidong in asung aumte lah ah gen leh sah aum seng sih a, ahin Pasian thu pen asung ate sang in apuolamaten abuaipi jelmong ahi hi. Pentecost ni in jong apuolam enten “Zukham hiva uh a chi ua, Jesu nua juiten Sacrament a neh chieng un Sisan leh misa ne in” ana kingohthei hi. Pasianthu pen atuompi khat suoh hi.Mangpan thupina tangta he.

Ministry and Family photo