Tuesday, May 21, 2019

Mang Gam (Pasian) nnasemte leh pension hun adihtatna

Rev. Hangpi Manlun

0. Thumapui: Awle tutung in dihtatna thu gen ding tamtah umlah ah Manggam nna sepna/pension hun a dihtatna thu igen ding uhi. Tualeh tam anuai thu kigente in koima mimal leh pawlpi kawhna leh genna ahisih a, atangpi in igam pumpi en a genna ahi chi kagen lang masa nuom hi.  Khawvel khantou toh kituohin Government lam hileh, Mission lam a nnasemtute adiehin kumlam a upa lamte ading in sepna kipat khawldam hun (pension) hun ang hita hi. Tuami umzie ahileh khangte hing kikhelin huntha ah ilutta uhi china ahita hi.  Tualeh nichin phielin zong local channel leh i News paperte uah pension kiha muding leh zahding jong tam mamata hi. Tualeh igam Mission nnasemte koi pawlpawl zong Pasian mapuina toh kum zakhat phial bang ihing hita uhi. Tuachin a nnasem masate ading in pension hun ahing hipanpanta a, tuban kum 10-zou chieng ngelin, akim khat phiel ki-pensionta ding hi. Tuaziehin ipen kum thu adihtatna poimawna thu igen ding uhi.

1. Paulam chinglou kipaulapte ahileh, ka pien kum dihtah kathei sih chi ahi. Tam atung a paulap khu tulai hattuom sung a semtu tampite buaina pen ahita hi. Azieh ahileh, semtu khen khatte khun apien kum dihtah gel lou a, a dihloupi gel a sepsawm um thei uhi. Etsahna ding in, hattuom khen khatte in asemtu uh pension na ding in, chini in akhen uhi. A sep hun sung kum sawmli (40) ahisih leh amapien kum, tuami khu anu gilsung akipat tami leitung a apien khiehni apat simin kum sawm guh-le-nga (65) aching masa penpen khu asemtute uh pension hun ding in bikhieh uhi. A khenten ahileh a semtute uh pension hun ding in apien kum, kum sawm guh or sawm guh-le-nga achin chieng ua pension pieh ding chite’n dan-le-dun anei uhi. Tami akipatin tena van zah ahileh, mani pien kum dihtah  china ahimai a, adang ahuop kha sih hi.

Hattuom sung ah Pasian sum nehguh/tahguhna (corruption) topsan va-ui

Rev. Dr. Hangpi Manlun

1).A umzie hilchetna: Awle ithupi uh, ‘Corruption’ ichi chieng un ilungsim uah sum-le-pai nehguhna lam maimai hiding in igingta paimai uhi. Ahin a aumzie, dihtakah khun tambang chau ahisih a, ‘thuneina zahkhielnate, midangten atanding ua kilawm atan lounate, mani bawldingte leh mani bawllou ding tanpha vabawlnate ban ah dihloutah a sum-le-pai munate khu corruption’ chi’n a huopthei ding hi. Tualeh corruption hamkam khu eima ham-le-pau bang mai-in i mangta ua, eiham a lekhieh ding hitaleh a lenadih tah theisiem ahamsa mama hi. Azieh ahileh ipu/ipate mi gin um leh siengthou ahizieh uh ahingei ding a amau hunlai in nakijang tamlou hingei ding hi. Tuaziehin, eiham zanglouin Sapham a ‘corruption’ chi’n izangtou ding uhi. Tualeh i Bible uah zong corruption chi kammal 80-vei val atuong a, tuate khu tahsa-le-hagau susie thei leh Mangpa lah a dihlou tah a khawsahna leh a dan jui utlou mite genna ahideupen hi.

2.Bible a Corruption thu imute uh isui masa ding uhi.

2.i).Adam leh Evite nehguhna thu. I Bible ietleh Genesis ah Pasianin Adam leh Evite nupa kung ah ‘sia leh pha theina sing ga khu nelou ding in thu apie’ hi. Ahin Setan thumang in nehlou ding sing ga anehtah ziehun, khawvel ah khelna alutta a, tuni dong in ei asuon-le-hahte uh mikhiel ihilawthu uh imu uhi. (Genesis 3). Tualeh Evi leh Adama’n nehlou ding anehtah ziehun, Pasianin ‘action’ a langal a, Eden huon apat a ‘notmang’ ngal mai hi.Tami a kipatin nehguh tah guhna pen Pasian toh kikhenna ahidan imuthei uhi.

2.2).AKan nehguhna thu. I Bible uah Joshua 7-na ah, Israelte Joshua lamkai a galjawna nasatah aneitou laiun, gingtatloupi in Ai khu neunou khat ajouta sih uhi.Azieh ahileh Akan in lahlouding a Pasian in achite analah tah ziehin Israelten guollelna leh muolphou nasatahmai a tangua, mitamtahin zong ahinna uh atuohlaw uhi. Tam Akan khelna khu Pasian in Israel mipite khelna bangin asim sah a aguol lel law uhi. Tami a kipatin mikhat nehguhna khu innsung, chi leh nam,  gam leh nam a ding a ngiem kiehna leh shinatanpha tuntu ahidante jong imuthei uhi.

2.3).Siempu Eli tate nehguhna. I Samuel 2-3-ah Siempu Eli taten Israelten maitam a kithoina ding sate Siempute nehdingte akineh ziehun, Pasian alungthah a a innsung uah  Pasian lungthahna/hena tungin a hunlouin ashilaw uh a zong asiempu hina uh zong abei lawta hi. Tamna kipatin nehguhna khu tahsa-le-hagau a Pasian samsietna leh khanggui tantheina ahidan jong imuthei uhi.

Missionary Nnasep Ding Dan (Khantan Hoi Puonzahna) Etdantha A Etna

Rev. Dr. Hangpi Manlun

1).Thumapui: Sapham a ‘Mission’ chi thu teng khu Latin ham a ‘Mitto’ pat a kilakhie ahi a, a umzie khu ‘Sawl’ china ahi. Tualeh, Greek hamin, ‘Apostello’ a kichi a, tua zong ‘Sawl’ china ma ahikia hi.Tami a kipatin ‘Apostle’ kichi eiham a ‘Sawltah’ kichi hina hing piengkhie zong ahi. Aumzie ahileh, sepding/bawlding poimaw (special) tah nnasem ding a, mawpuohna kipie china ahi. Bible Dictionary khatin, missionary khu, “Sahkhuo pawl a member khat, mundang a khantanhoi gen ding a kalsuon amaw, zilsahnate, laisiemnate, khawtang kilemnate, damtheina leh lampi tuomtuomte a zilsahna petu” a chi hi. Tami thuteng ‘missonary’ chi thu bul khu 1598 AD-a hing kizangpan ahita a, a umzie khu ‘sawlkhie’ amaw, ‘thawnkhie’ amaw chinate ahi. Tami, missionary chi kamteng khu Jesuit pawlte in nnasem ding a, a sawlkhieh uh hamkam zahna in zong anazang masapen uhi.

Tualeh, Khristian ‘Mission’ chi khun Khristian loute Jesu Khrist kung a puilut ding leh Khrist khantanhoi gingloute kung a gen ding a, sawlkhieh chinate ahideu pen hi. Ginglou mi leh a theiloute kung a Khrist khantanhoi puonna thu genna ahi hi. Baibul tang kingahnate ahileh, Matt. 28:18-20; Luk 24:46-49; Johan 20:21; Nasepte 1:18-te leh a dangdangte ahi uhi. Tamte banah, Pa in a Tapa Mangpa Jesu a sawl a, Jesun a nuazuite a sawl kia a, tamkhu mission umzie dihtah ahi hi. 

            Tuabanah, Thuhun Lui ah khun Pasian khu hagau mangthai sui masapen ahithu imu uhi. Azieh ahileh Adam leh Evite khu Eden huon a Pasian a koi laiun, nehlou ding a a chi sielehphatheina sing ga a nehtah un, Pasian in “Adam hei a um ne” chiin a han a, misiemte khun tami khu Pasian in mi khielte/hagau mangthaite asuina kamteng masapen ahi chi uhi (Gen. 3:8).

            Tualeh, Pasian in Abraham zong mi dangte a ding a guolzawlna hiding in a han hi (Gen.12). Tuabanah, Israelte zong tami leitung pumpi a vahna tuntu hiding in a na belguot a, ahin, Israelten, Pasian guotna leh lametnate a suhpichin zoutahlou ziehun, A Tapa Jesu sisan tungtawn in ei hattuomte hing phutkhie in angteldoh a, tuachin mopuohna hattuomte tung ah ang ngata hi. Missionary nnasep khu Pasian lungtang leh tup-le-ngim (heart beat) ahi.

Bible a hun nu khia thute

(Rapture, Rapture nua a hun hamsa (Tribulation)-thu, Second Coming leh Kumsang vaihawm ding dan thute):

Rev. Dr. Hangpi Manlun,
Moderator, Zou Synod

1). Thumapui: Awle, tam atung a thute  rapture, second coming leh kumsang vaihawm ding thute ahi uh leh hattuom din chil a kipat tunidawng a mite lung boina leh ngaidan/pawmdan tamtah a umziehin isui ding uhi. Mangpa Jesu Khrist hing pei ding thu leh tamna igente uh khu Kihilna bu sung a alaimu/thugil pen a chithei ding hi. Tamte khu Bible in ‘thu guh kiphuol’ a chi hi. Tam ‘thuguh kiphuol’ chi hamkam Greek hamin, ‘mysterion’ ahi a, Saphamin, ‘mystery’ chi ahi. Tualeh, Thuhuntha ah 27-vei a kigiel hi. Sawltah Paulin, “Ngaiun, thuguh kiphuol ka hing hil ding hi” (I Kor. 15:51)-ah a chi hi. Aumzie khu ‘sil kiphuol’ ahi a, sil kiphuolte khu atangpiin, Pasian kumtawn lemguot, a huntah a hingtung leh puonzah a umte hi uhi. Tualeh, mitamtahte ngaidan in rapture leh second coming-te khu a kibang leh khat vei a tungkhawm ding bangin ngaidan a kineithei a, ahin ahiloudante isuiding uhi. 

2). Rapture: Saphama a ‘rapture’ chi khu Latin ham a, ‘rapere’ chi a kipat a kiletkhie ahi. Rapture pen Jesu khu tam leitung a hattuomte (Ama gingtute), a mousiengthoute hing pui ding a huikhuo a, ang peina ding khu rapture ahi.  Tam hun chieng in leitung ah a hing kum sih ding a, huikhuo ah, a misiengthoute Jesu toh kituoh ding in suhlam dang in i um ding uhi. Sawltah Paulin chiengtahin a gen a, “… kinepna neilou midangte banga, na lungkhamlouna ding un, i mute tungtang na theilou uh ka deisih hi…. Eite Mangpa hing pei donga, dam a na um nalaiten i musate/mishisate i makhel sih ding uhi. Aziehpen, Mangpa ngei khu kikou aw toh, tualeh pengkul ging toh Van a kipat hing kumsuh ding hi. Tualeh, Khrist a shisate a thou masa ding uhi. Tuazou chiengin ei hing a na umnalaite huikhuo ah, Mangpa tuoh dingin a mau toh meipi lah ah lahtouin i um ding ua, tuachi’n kumtawn in, Mangpa kung ah i umta ding hi. (I Thess. 4:13-17).   

         Tualeh, rapture khu bang chieng a hingtung ding e chi a kitheithei sih a, thakhat thu a itheilou kal ua hing tungding ahi a, hun khat poupou a tung thei ahi (Titus 2:13; 1 Thess. 4:13-18; 1 Kor. 15:50-54). Mangpa Jesun zong ahunding ahileh, Tapa leh vansawltahte in zong a theisih ua, Pa lou ngalin a theisih a chi hi.  Tuabanah, rapture chiengin gingtu ashisate, Abel a kipat a tuahun tan a shite athou masa ding ua, tualeh gingtu ahing nalaite suhdang lam a um in, huikhuo ah lahtouin i um ding uhi. Tualeh, kum 7-vaihawmna masang a hing tung ding ahi.

Khristian Innsung/Innkuon Nuom Umzie Leh Hinate

Rev.Dr. Hangpi Manlun

1)Thumapui: Awle, i thupi uh Khristian innkuon siemphatna ding a nu-le-pa mawpuohna chi khu tulai igam dimun et in i kul-le-poimaw mama khat uh ahi. Tualeh, innkuon nuom khu hing pong um mai ding ahisih a, asung a tengten tahsa-le-hagau a pan ilahna zieh ua hing umthei ding ahigiep hi. Tualeh, nu-le-pa khen khatte a ding in i tate hinkhuo uh siemphatna ding in ikikhel in i vaigeita maithei ua, ahin itute tung beh uah etkawlna mopuohna ineithei nalai uh chi imanghil sih ding uhi.

2)Baibul in innkuon agendan
I Laisiengthou masapen uh (Genesis) khu innkuon thu in akipan a, atopna Kihilna (Revelation) zong khu innkuon thu ma in atop hi. Tuaziehin, innkuon khu leitung um chil aum, government-te, school-te leh kipawlkhawmna tuomtuomte um masang a zong um masapen ahi. Tualeh, i Mangpa Jesun zong innkuon ana ngaina/          khawh ahingeiding a, leitung ah kum sawmthum-le-thum (33)-vel a damsung in zong kum 30-tah innsung nnasepna buoi ahingei ding a, atanchin imusih uhi.

2.i)Khristian innkuon poimawna asang deudeu hi.

Laigeltu khatin “Khristian innkuon khu a lawmpi (group) a, igen uh ahin amun dihtah a, ibuopi peilou uh ahi” achi hi. A dih mama a, biehinn leh houlimnate lah ah igen zing ua, a hin amun dihtah ah koiman isempei tahtah sih uhi. Rev. John Stot in, “Leitung leh hattuom hoina ding in innkuon hoi ipoimaw ua, innsung a hoi leh hattuom leh leitung jong ahoi hi” achi hi.  Tuabanah, Rev. Dr. Kenneth Chap khun “Leitung khu bang chi bang a um ding e, chi mai zong hilou, tulaitah leh dachieng a, leitung hing umtou zel ding dan etna (machine) khu innsung ahi” achi hi. Colson in tambangin agen a, “Sildang bangma’n innkuon dinmun aluozousih ding, innkuon aumsih leh tate’n hinkhuo bawlkhiehna dingin kingahna anei sih ua, innkuon tellou hindan ding a theisih ua, a hinkhuo uh puitu ding khu amau sa utna leh noptatna ahi mai hi” achi hi.

Nikhat Henry Grady in Washington khawpi a vaihawmna inn lien (White house), khu a vamu kha hi. Lamdang sa tahin, “Tami innpi hi e maw ichi inam leh igam (USA), pienkhiehna bulpi, Pasian mitmu a namloupi leh thupi bul kipatna khu” achi hi. Ahin hun tomnou khat sung in singtang khuo khat ah avakhuoljin a, azin tunnate khu Khristian hoitah ahi ua, a inn neipan a zi-le-tatate Pasian thu athujaw dan leh gam-le–nam a dia ana thum zing dan uh ahidan ang mutahin “Eh pehlum (marble) akibawl inn thupi amaw igam siemna leh tung dingtu ka chi a, tambang a Khristian innkuon hoi tahtahte zieh a US gam kitung ding ana hijaw bou vele” achita hi.


2.ii).Khristian innkuon kingahna (Foundation) khu Jesu Khrist ahiding ahi.
Innlien leh loupitah lam ding in amasapen in a kingahna (foundation) khu apoimaw masapen hi. Tua ahisih leh tomlou kalin apuomai ding hi. Tuabangin, i innkuon kingahna uh i Mangpa Jesu ahiding ahi. Billy Grahamin “Na innkuon kingahna uh Mangpa Jesu ahisih leh dateh hamsatna huipi in ang mutchieg in na dingdet zou sih ding uhi” achi a agendih mama hi. Tuin innsung hoina ding a nu-le-pate mawpuohnate isui/gen ding uhi.
TAPIDAW DAWNGKOT